СВЯЩЕННЫЙ СИНОД УТВЕРДИЛ ТЕКСТ МОЛИТВЫ СВЯЩЕННОМУЧЕНИКУ ФИЛИППУ РАСПОПОВУ

· от · в

24 октября 2024 года Священным Синодом был утвержден тексты молитвы священномученику Филиппу Распопову.

МЕСЯЦА НОЯБРЯ В 23-Й ДЕНЬ
СВЯЩЕННОМУЧЕНИКА ФИЛИППА РАСПОПОВА,
ПРЕСВИТЕРА
Тропарь, глас 3:
Троице Святей изрядно потрудившуся/ и даром любве Божественныя обогатившуся,/ Филиппу священнострадальцу умильно глаголем:/ умоли Триединаго Бога милостию посетити ны,/ поет бо тя дальнероссийская земля// яко усерднаго предстателя тебе почитающих.
Кондак, глас 5:
Во одежды жизни вечныя/ мнози людие от рук твоих одеяшася/ во струях реки Амурския./ Риз же твоих от рук гонителей совлечен,/ в купели оледененней, святе Филиппе, спогреблся еси Христу/ и в радость Господа твоего совшел еси./ Темже ныне моли Человеколюбца/ растопити оледеневшая сердца наша// огнем любве Божественныя.
Молитва
О, преславный отче наш Филиппе, иерею и исповедниче, многая мучения претерпевый и Христу верен бывый даже до смерти! Ты бо, Святей Троице усердно служа, никакоже отступил еси повеления апостольскаго, еже образ быти верным словом, житием, любовию, духом, верою и чистотою. Призри от Небеснаго града на пределы России Дальния, на всю Землю Русскую и на люди ея: се бо мнози, якоже девы юродивыя, во тьме неведения ходят, ныне же самая година есть еже храм Святаго Духа в сердце своем созидати.
Темже молим тя: испроси у Всеблагаго Бога пастырем ревность, монашествующим в молитвах укрепление, властем рассуждение, воинству нашему на враги одоление, юным наставление и всем верным во Православии утверждение, да, на светлый образ жития твоего взирающе, мысленныя наши очи ко Святей Троице возведем и прославим Отца и Сына и Святаго Духа во веки веков. Аминь.

Просмотры(14)